中醫怎樣睇病？衛、氣、營、血

中醫會將病分成四個階段，衛、氣、營、血，四個階段可以係病嘅種類嘅不同，亦都可以係一個病嘅演進過程。

第一衛份嘅病就係我哋平時傷風、感冒、流鼻水、打乞嗤。呢啲就係我哋防禦能力不足，所以係屬於衛份嘅病，呢種病亦都相對容易醫亦都快痊愈，通常幾日我哋就會好返。

第二個階段係氣份嘅病，譬如我哋會有支氣管炎、慢性咳嗽或者有腸胃不適，肚痾、胃氣脹、胃痛或者便秘，呢啲都係屬於氣份嘅病，未去到真正好深層，呢啲病嘅治療時間亦都相對就要長一啲。

第三個階段係營份嘅病，即係話已經過咗衞、氣階段都醫唔好，而發展落去就會係一啲比較嚴重嘅發炎、增生、糖尿病、良性嘅腫瘤，情緒抑鬱呢一類嘅問題，營份嘅病已經影響到我哋臟腑運作同埋日常生活。

第四個階段嘅病就係血份病，已經直接傷害到我哋臟腑，會有好多嚴重嘅病，例如癌症或者係自身免疫系統嘅病，紅斑狼瘡，中風，都係屬於血份嘅問題！

中醫治病嘅方式係要搵個病本源，然後將個病慢慢由深層推向返淺層而令到個病人可以自身回復健康，要有番修復或者免疫嘅能力，所以相對嚟講要重建返呢個程序，就要比較長時間同有耐性，亦都要喺生活、運動上作出配合先至可以。

總結如下：
1.⁠ ⁠衛階段：代表防禦能力不足，常見傷風感冒、流鼻水、打噴嚏，病輕易醫好，快痊癒。
2.⁠ ⁠氣階段：如支氣管炎、慢性咳嗽、腸胃不適等，病較深層，治療時間較長。
3.⁠ ⁠營階段：出現發炎、糖尿病、良性腫瘤、情緒抑鬱等，影響臟腑功能和日常生活。
4.⁠ ⁠血階段：病情嚴重，傷害臟腑，如癌症、自身免疫病、中風等。

中醫用望、聞、問、切四診綜合分析，從外象推內因，辨證求因，識別病機，並慢慢從深層（血營）推向淺層（衛氣），幫助身體恢復自我修復能力。